Alain Bouchart :

Grandes Chroniques de Bretaigne. 1514.

...

            Lan de grace troys cens quatre vingts et six, qui fut cinq ans après ce mariage, celluy Maximien, voyant la grande habondance des tresors et richessez qu'il avoit trouvé au royaulme de la grant Bretaigne, aussi le grand nombre des gens belliqueux dont le royaulme estoit peuplé, par l'avis et conseil de Conan Meriadec il entreprint de conquerir les Gaulles, esquelles y avoit dix royaulmes, possidés et occupez par dix roys payens et gentils, des quels le royaulme d'Armoricque estoit l'un, qui lors estoit possidé par ung roy payen nommé Jubaltus ou Jubault. Et estoit celluy royaulme d'Armoricque le plus puissant et opulent des autres de la Gaulle, tant de fruictz, de pastures, forestz, que de mer et autres ubertez. Et dit Plyne que Acquitaine estoit anciennement appellee Armoricque. Voyez Volaterranus ou troysieme livre, chappitre dernier, au commencement d'icelluy chapitre.

            Comment Maximien et Conan Meriadec conquisdrent le royaulme d'Armoricque, dont Jubaltus estoit roy et comment Jubaltus fut occiss en bataille.

            Celuy Maximien, nouveau roy, fist ou royaulme de la grant Bretaigne assemblee dde gens et de navires et monta sur mer avecques Conan Meriadec; a tout son exercite descendit ou royaulme d'Armoricque, à une coste de mer appellee l'Armor. Jubault roy d'Armoricque vint au devant à grant puissance de ses subjectz en armes. Finablement, Maximien et Conan eurent la victoire contre Jubaltus, lequel fut occis avec cinq mille hommes armez ses subjectz, et le sourplus se mist en fuitte. Et par ce moyen, Maximien et Conan conquisdrrent toute Armoricque; et pour eulx rafraichir se rretirerent en la principalle ville du pays que l'on apelloit Ville Rouge, qui à présent est la cité de Rennes.

Cy finist le premier livre de ceste cronicque