pages 528, 529

Pages 528, 529

*******

Pempvet devez warn-ugent a viz Gouere

SANT JAKEZ

Abostol, patron ar Spagn (42)

----------

Jakez, mab da Zebede ha da Zalome, breur da Yan an avieler, a oa ginidik eus ar Galile. Jezuz o tremen eun devez e-biou lenn-vor Jenezareth, hen gwelas gant e vreur yaouank oc'h ôzan o rouejou en o bag; o gervel a reas da vont gantan, hag e tilezjont war an tol o c'herent hag o rouejou, evit heuilh an Otrou.

Jezuz o lezhanve Boanerges, da lavaret eo, bugale ar c'hurun.

Jakez a oe unan eus an tri abostol a oa karet gant Hon Zalver dreist an Ebestel-all. Hen c'has a reas gantan da vene Thabor, pa lakas da baran war e gorf ar sked dudius eus a c'hloar ar baradoz, ha da vene Olivez, pa bignas warnan da bedi e Dad, arôk ma krogas ar Judevien ennan.

Salome, mamm Jakez ha Yan, o c'houzout pegement oa karet he bugale gant Jezuz, a deuas eun devez d'e gaout, hag a c'houlennas digantan ober d'he daou mab azezan en e rouantelez, unan en e du deou hag eun all en, e du kle.

Kement-se a roas tro d'Hon Zalver d'ober d'e ziskibien eur gentel gaer war an izelded a galon.

- Rouaned ar bed-man, emezan, hag ar re a zo en penn ar boblou, a ra o mestr war ar re a zo dindanne; evidoc'h-hu, arabad eo d'ec'h ober evelse. Mes an neb ac'hanoc'h a fell d'ezan e vefe savet eun de dreist ar re-all a dje breman bezan ho servijer, hag an neb eu deus c'hoant da vezan eun de ar c'hentan a dle breman en em zerc'hel er renk izelan.

Goude ma pignas Jezuz-Krist en nenv, Jakez a brezegas ar fe er Jude hag er Samari, hag a c'honezas eleiz eus e genvroïz d'ar greden neve. Bezan e oe ar c'hentan o kas ar c'helou mat d'ar Spagn, hag e-touez ar re a vadezas er vro-ze, sant Per a gavas danve seiz eskob.

Eus ar Spagn, Jakez a zizroas da Jeruzalem, hag e teuas a benn da c'honid da Zoue ar zorser bras Hermojen.

Herodez Agrippa, evit bezan arru mat gant ar Judevien, a roas urz d'e zibennan.

An hini en devoa e gaset d'al lez-varn, o welet pegen kalonek e oa an abostol dirak ar maro, a 'n em zisklerias kristen war an tol.

En em strinkan a reas da dreid ar zant da c'houlenn pardon outan; an abostol hen briataas en eur lavaret : « Ar peuc'h ra vezo ganec'h ! »

Dibennet a oent o-daou, er bla 42 goude donedigez Hon Zalver.

Jakez oa ar c'hentan eus an Ebestel o skuilh e wad evit Jezuz-Krist.

Prest goude, e ziskibien a zigasas e relegou da El-Padron, er Spagn. Chom a rejont eno kuzet epad meur a gant vla. En IXet kantved, e oent dizoloët ha kaset da Gompostel.

Di ec'h eer breman da bedi sant Jakez, n'eo ket hepken eus ar Spagn, mes eus pevar c'horn ar bed kristen.

Goude Jeruzalem ha Rom, n'eus lec'h ebet ken santelaet gant fe ha peden ar gristenien.

Hon tud koz gwechall a oa troët da vont a-bell da bardonan : mont a rênt da vene Sant-Mikel er mor, ac'hane da Zant-Jakez Kompostel, goude da Rom, hag erfin da Jeruzalem. Eun diskuiz a rênt en Sant-Jili, a zo hanter-hent etre Kompostel ha Rom.

Sant Jakez en deus harpet ar Spagnoled en o brezeliou; gwelet eo bet en penn o armeou o stourm eneb ar Vorianed; abalamour da ze eo bet kemeret da batron rouantelez Spagn.

************

BOKED

Evel m'eo sant Per abostol ar fe, ha sant Yan abostol ar garante, sant Jakez eo abostol an esperanz. En eun amzer ec'h omp, ha kant mil dra a venn mougan ar vertuz gaer-ze en hon ineou; goulennomp ouz sant Jakez he lakat da vleunian ennomp.

Evel an heor a vir na ya al lestr da goll epad an avel-stourm, evelse an esperanz a vir na ro an ine e asant d'an droug, en mare an dentasion.

SANT BONAVANTUR

*******

geriadurig lexique Evit komz diouzh al levr-se / pour discuter de cet ouvrage : Academia Celtica